هي دي مصر ياعبلة

حدث لي موقف في معرض سجاد للنساجون الشرقيون وهو بالمناسبة لمن لا يعرف فخر الصناعة المصرية

اللي حصل اننا كنا بنشتري سجاد في معرض المفروض انه بيبيع بضاعة درجة أولي
وبعد ما اخترنا السجاد اللي هناخده ودفعنا الفلوس دخل العمال يلفوا السجاد
لكن نظرا للتأخير والوقت الطويل اللي اخده العمال ومطلعوش السجاد قلقنا وقلنا ندخل نشوف الحكاية
والحكاية بقي كانت صدمة
العمال اكتشفوا ان فيه ديفوه عباره عن دايره حمرا في السجادة (اللي هي ابيض في اسود) ومينفعش بأي حال من الاحوال يكون فيها احمر
المهم والظاهر اننا كنا صعبانين علي العمال وحسو اننا لو مخدناش السجاده دي يمكن منلاقيش سجاد تاني يعجبنا في مصر
او فكرو انهم لو ماباعوش السجادة فالشركة هتضيع وهتخسر فتفتق ذهنهم علي انهم لازم يتصرفوا

المنظر كان كالآتي : اربع عمال كل واحد ماسك كاتر في ايده وشغال تقطيع في الوبر الأحمر علي اساس انهم بيعملو لمصلحتنا ومصلحة الشركة وطبعا اول ما فوجئو اننا شفناهم عملو نفسهم بيلفو السجادة
طبعا حاولنا نكون ناس متحضرين ورحنا اشتكينا للمدير اللي هو صراحه اتضايق جدا وبعت جاب العمال عرفهم غلطهم
المشكلة بقي اني بقول للمدير مش المفروض يعني اننا في معرض سجاد درجة اولي .. لقيته قالي ماهو اصل اللي بيفرز السجاد في الكواليتي كنترول بشر واكيد بيغلط وبعدين متنسيش اننا في مصر يعني
ياسلااااااااااااااااام
هو ده تبريرالسيد المدير اننا في مصر
علي اساس ان مصر ناقصة بلاوي وعلي اساس ان مصر هي اللي وحشة وهما حلوين

طبعا حاول يعمل اي حاجة ترضينا وخلي العمال يطلعو كل السجاد اللي بنفس الشكل من المخزن لكن المصيبة الاكبر ان كل السجاد كان فيه نفس العيب
مش يسكت بقي ويتكسف علي دمه
لاء
فضل يقنعنا ناخد سجاده تانية كانت عجبانا الاول
وشكرا علي كده
وطبعا مخدناش السجاد
واللذيذ في الموضوع ان عمو المدير كان قاعد وورا دماغه لزق كانت متعلقه سجاده كبيرة عبارة عن صورة واحد مش بحبه
وعلشان افش غلي بس قبل ما نطلع قلت له
ياريت تشيل الراجل ده من هنا

وتوته توته خلصت الحدوتة